Հունաստանում ՀՀ արտակարգ և լիազոր դեսպան Տիգրան Մկրտչյանը մասնակցել է «Floral Meteorites from Armenia» ցուցահանդեսի բացմանը։ Ցուցահանդեսը Հունաստանում առաջին անգամ ներկայացնում է հայ նկարչուհի Սարկո Մենեի ստեղծագործությունները։ Այն հյուրընկալվել է Աթենքի Kourd Gallery պատկերասրահում՝ Հունաստանում ՀՀ դեսպանության աջակցությամբ։ Միջոցառման առիթով դեսպանը շնորհավորել է Սարկո Մենեին և ցուցահանդեսի համակարգող Էլենի Վարոպուլուին, ինչպես նաև իր երախտագիտությունն է հայտնել Kourd Gallery պատկերասրահի ղեկավար Հայկ Քուրդօղլանյանին՝ ցուցահանդեսի իրականացմանն ուղղված նախաձեռնության և հետևողական ջանքերի համար։
Դեսպանն անդրադարձել է Սարկո Մենեի որոշ կտավների՝ հունական դիցաբանության և փիլիսոփայության հետ ունեցած առնչություններին, առանձնահատուկ ընդգծելով արվեստագետի ձգտումը՝ կապ հաստատելու այն երկրի հետ, որտեղ ծնվել է նրա մեծ հայրը՝ Հունաստանը։
Իր ելույթում դեսպանն ընդգծել է մշակութային դիվանագիտության կարևորությունը Հայաստանի և Հունաստանի միջև երկարամյա բարեկամության ամրապնդման գործում՝ նշելով, որ մշակութային նախաձեռնությունները արժեքավոր հնարավորություններ են ստեղծում ժողովուրդների միջև կապերի հաստատման, գաղափարների փոխանակման և արվեստի ու ստեղծագործական գործունեության միջոցով միմյանց ճանաչելու համար։
Նա ընդգծել է, որ երկու երկրների հարաբերությունները դուրս են գալիս ընդհանուր պատմական ժառանգության շրջանակներից՝ ներառելով արվեստագետների, մշակութային հաստատությունների և արվեստի համայնքների միջև համագործակցության նոր հնարավորություններ։ Դեսպանը նաև կարևորել է այս նախաձեռնության շրջանակներում ձևավորվող անձնական կապերը՝ ընդգծելով դրանց ներուժը՝ ոգեշնչելու ապագա մշակութային ծրագրեր և առավել խորացնելու հայ-հունական հարաբերությունները։
«Floral Meteorites from Armenia» ցուցահանդեսի բացումը համընկնում է Աթենքում հայկական մշակույթի համար մեկ այլ նշանակալի իրադարձության՝ Ակրոպոլիսի թանգարանում կայանալիք «Հնագույն Հայաստան» ցուցահանդեսի հետ։ Ցուցահանդեսն իրականացվում է Հունաստանում Հայաստանի դեսպանության նախաձեռնությամբ և աջակցությամբ։ Դրա բացումը նախատեսված է 2026 թվականի նոյեմբերի 20-ին, իսկ ցուցադրությունը կշարունակվի մինչև 2027 թվականի մարտը։
«Հնագույն Հայաստան» ցուցահանդեսում կներկայացվեն շուրջ 200 հնագիտական ցուցանմուշներ, որոնք կբացահայտեն Հայաստանի մշակութային զարգացումը նախապատմական ժամանակներից մինչև քրիստոնեության սկզբնավորումը՝ մ.թ. 4-րդ դարում։
Ցուցահանդեսը նաև լույս կսփռի Հայաստանի պատմական կապերի վրա տարածաշրջանի ավելի լայն շրջանակի հետ՝ ներառյալ Մերձավոր Արևելքը, Միջերկրական ծովի արևելյան հատվածը, Կիպրոսը, Կրետեն և Էգեյան ծովի Հռոդոս և Սամոս կղզիները։
Ելույթի ավարտին դեսպանը վերահաստատել է Հունաստանում ՀՀ դեսպանության հանձնառությունը՝ խթանելու հայկական մշակույթը և զարգացնելու երկու երկրների միջև մշակութային փոխանակումները։ Նա հույս է հայտնել, որ ցուցահանդեսը կնպաստի գեղարվեստական համագործակցության հետագա զարգացմանը, կամրապնդի ինստիտուցիոնալ և անձնական կապերը և առավել կմերձեցնի հույն ու հայ ժողովուրդներին։
2026. 26.10
